Natapos ang tatlo ka oras nga operasyon kay Pope Francis sa ospital sa Roma nga wala sang kumplikasyon.
Suno sa Vatican, sa Gemelli Hospital naka-admit ang 86-anyos nga Santo Papa kag ginalauman nga magatinir pa didto sa sulod sang pila ka adlaw apisar tapos na ang surgery.
Kanselado naman tubtub sa Hunyo 18 ang tanan nga papal audiences.
Una na nga ginkumpirma ni Vatican spokesman Matteo Bruni nga pagkatapos sang colon surgery ni Pope Francis sang 2021, nagsuprer naman ini sang hernia nga nagatuga sang sulit-sulit, masakit, kag masami nga pagguwa sang sintomas.
Ginpahayag man una ni Bruni nga ipaidalom ang Santo Papa sa general anesthesia para sa laparotomy kag abdominal wall surgery nga amo ang nagatumod sa surgical incision sa abdominal cavity.
Suno naman kay Vatican Secretary of State Pietro Parolin, kun matapos na ang operasyon kag kun may importante nga mga butang nga kinahanglan desisyunan na gilayon, dal-on ini sa Santo Papa sa ospital agud nga siya ang maka-desisyon.
Ang pagkansela naman sang audiences sang Santo Papa tubtub sa Hunyo 18 ang kabahin sang precautionary measure suno sa Vatican press office.
Kun basehan ang latest schedule nga ginpaguwa sang Vatican, magabyahe si Pope Francis sa Portugal sa una nga bahin sang Agusto; kag pagasundan ini sang byahe sa Mongolia umpisa sa Agusto 31.
