ILOILO – Ginaduso ni Iloilo Governor Arthur Defensor Jr. sa Provincial Population Office kag sa Department of Education nga i-activate ang teen centers sa tagsa ka banwa sa probinsya sang Iloilo.
Ini ang kasunod sang ginakabig makaalarma nga pagtaas sang record sang suicide incidents sa probinsya sang Iloilo kun sa diin santo sa record sang Iloilo Provincial Police Office (IPPO), nagdangat na sa 29 ang mga naghikog humalin sang Enero tubtub Hunyo 18 subong nga tuig.
Sa interview sang Bombo Radyo kay Defensor, iya ginpahayag nga posible nagadugang pa sa problema sang mga kabataan nga ginpatuman nga lockdown sa probinsya.
Aminado man ang gobernador nga tuman ka kulang ang mga guidance counselors sa eskwelahan nga amo kuntani ang makabulig sa mga estudyante.
Bangud sini, ang ginalantaw nga programa amo ang pagbalik sang teen centers agud may yara sang sarang mapalapitan ang mga pumuluyo partikular na ang mga kabataan nga may yara sang mabug-at nga ginabatyag.
Suno pa kay Defensor, bangud ginalauman man nga wala na sang face-to-face nga klase subong nga school year, dapat nga tutukan ang counseling sa mga teen centers.
Gin-athag man sang natungdan nga may yara sang P1.5 million nga budget ang Iloilo Provincial Government sa idalom sang Provincial Social Welfare and Development Office agud masuportahan ang nasambit nga programa.
