Liwat nga nagpanawagan si Senate Minority Leader Aquilino “Koko” Pimentel III nga magpatuman sang temporary work break ukon cumpulsory nga pahuway sa tunga sang nagatagiti nga init sa nagkalain-lain nga bahin sang pungsod.
Ginhingyo man ni Pimentel sa gobyerno nga maghimo sang mga tikang kaangay sang ginahimo sa United Arab Emirates (UAE) agud nga maprotektahan man ang mga mamumugon sa tuman nga kainit sang tyempo.
Partikular nga gin-mensyonar ang direktiba sang Ministry of Human Resources and Emiratisation sa United Arab Emirates kun sa diin ginsuhestyon man ni Pimentel nga mahimo maimplementar ang limitasyon sa trabaho kun tuman na gid ang init.
Ginsaad man sini nga kinahanglanon ang occupational heat safety kag health protocols.
Kinahanglan suno sa senador nga mag-obra ang Department of Labor and Employment kaupod sa pribado nga sektor agud nga ma-implementar ang kaangay nga polisa.
“As I said last year, there should be a temporary work break or compulsory rest periods when the heat index reaches a danger level,” pahayag ni Pimentel.
Sa klasipikasyon sang state weather bureau nga Philippine Atmospheric, Geophysical and Astronomical Services Administration (PAGASA), ang “danger” level heat index amo ang heat index nga nagatupa sa 42 tubtub sa 51 degrees celsius nga nabatyagan na sa nagkalain-lain nga parte sang Pilipinas halin pa sang katapusan sang Marso.#
