ILOILO CITY – Ginasugat sang Iloilo City Government ang tanan nga COVID-19 positive nga pasyente sang syudad — symptomatic man ukon asymptomatic — agud nga madala sa quarantine facilities.
Sa interview sang Bombo Radyo kay Mayor Jerry Treñas, iya ginpahayag nga ginalikawan na nga masulit ang mga kaso nga may yara sang household clustering of infection ukon paglatnanay sang virus sa sulod sang balay.
Una diri, ang overwhelmed nga facilities kag mga ospital amo ang isa sa mga gintumod nga rason kun ngaa naghingyo ang alkalde nga batakon sa mas istrikto nga modified enhanced community quarantine status ang syudad.
Suno pa kay Treñas, nagparequest siya sang dugang nga oxygen tanks agud nga maka-cater pa ang quarantine facilities sang pasyente — mild man ukon severe ang sintomas nga ginabatyag.
Santo sa daily monitoring sang Iloilo City Government, ang mga available lang nga sections sa mga ospital amo ang para sa mga kabataan kag nagabusong.
‘Effective immediately’ kuntani ang nakabutang sa executive order ni Mayor Treñas apang gin-hold bangud wala pa nakadagdag sang approval ang IATF.
Nagalaum man si Treñas nga ang iya nga temprano nga pagpagwa sang executive order ang makabulig agud nga makahanda man ang mga tawo sa mas istrikto nga quarantine classification.
