Gin-anunsyo sang Chinese Foreign Ministry nga ginadumilian nila si Defense Secretary Gilberto Teodoro Jr. kag ang iya pamilya nga makasulod sa mainland China, sa Hong Kong, kag sa Macau.
Sa pahibalo sang ministry, ginadumilian man ang mga indibidwal sa bug-os nga China nga makig-transaksyon ukon magkooperar kay Teodoro, sa iya asawa, kag sa iya anak.
Ini nga sanctions sa tiglikom ang nagatuyo suno sa China nga proteksyunan ang ila nga soberanya, seguridad, kag interes sang ila nga nasyon.
Suno pa sa Foreign Ministry, ginhimo ini nga lihok bangud sang sulit-sulit nga iresponsable nga mga pahayag ni Teodoro batok sa China nga nagapakanubo sa ila lehitimo nga mga interes kag nagasabotahe suno sa Beijing sa relasyon sang Pilipinas kag China.
“To uphold China’s sovereignty, security and development interests, China has decided to prohibit Gilberto Teodoro Jr. and his spouse and child from entering the Chinese mainland, Hong Kong and Macao, and not allow organizations and individuals in China to engage in any transaction, cooperation or other activities with him and his spouse and child,” kabahin sang statement sang Chinese foreign ministry.
Nahibaluan nga lakip si Teodoro sa pinakamabaskog nga kritiko sang mga ginahimo sang China sa West Philippine Sea. Ginasabat man sini nga masangkad nga maritime claims sang Beijing.
Una na nga nagguwa sang Hunyo ang reports nga gin-ban si Teodoro kag ang iya pamilya sa China, apang nagsabat man ang tiglikom nga wala man siya sang propiedad sa amo nga pungsod kag wala man siya sang plano nga magbisita didto.
Sandig sa reports nga una nagguwa, posible nga naangot ang restrictions kay Teodoro kag sa iya pamilya sa Philippine law enforcement operation sa steel company sa Misamis Oriental kun sa diin may Chinese nationals nga ginaalegar nagamanehar sang delikado nga mga materyales.
Ang anunsyo sang sanctions kay Teodoro ang ginhimo inoras antes ang selebrasyon sang Independence Day sa Pilipinas.
As of this writing, natalana pa nga magpaguwa sang statements ang tiglikom kag ang Department of National Defense.#
