Personal nga nagbisita si North Korean leader Kim Jong-Un sa navy unit sang pungsod kag nanguna sa iya ginmandu nga cruise missile test nga kadungan man sang joint military drills sa tunga sang South Korea kag United States.
Suno sa state media sang Pyongyang, nagpatigayon si Kim sang inspection sa navy sa East Sea ukon mas kilala nga Sea of Japan, kag didto gin-stage sang crew ang cruise missiles.
Wala partikular nga gin-athag kun ano ini nga mga missile apang ginlaragway nga ini ang klase nga maigu ang target nga wala gid sang sala.
Nahibaluan nga gin-umpisahan naman sang Seoul kag sang Washington ang tuigan nga “Ulchi Freedom Shield” drills ukon ang major joint exercise sa tunga sang duha ka pungsod nga magalawig tubtub sa Agusto 31. Lakip diri ang 30 field training events nga gin-base sa mga senaryo pananglitan matabo na ang gyera.
Matandaan nga una na ini gintawag sang Pyongyang nga rehearsal sa patigayunon nga invasion kag una na ini nagpaandam nga magabalos sila bangud sa amo nga joint military drills.#
