Ginaduso ni Senator Francis Tolentino ang pagdeklarar sang national state of calamity agud nga mapahagan-hagan ang malala nga epekto sang El Niño phenomenon sa ekonomiya sang Pilipinas.
Ini nga suhestyon sang senador ang kasunod sang resulta sang Social Weather Stations survey kun sa diin nakasaad nga 14.2 percent sang pamilya nga Pilipino ang naga-eksperyensya sang kagutom sa first quarter sang tuig.
Suno kay Tolentino, indi lang dapat localized ang deklarasyon sang state of calamity kundi dapat nga national na ang scope para nga ma-apply ang nakabutang sa Price Act ukon ang pag-freeze sang presyo sang nagapanguna nga mga balaklon.
Lakip man sa ginrekomendar sang senador amo ang cloud-seeding operations nga una naman nga ginsiling sang Department of Agriculture (DA) nga ginahandaan na sang ahensya.
Dugang ni Tolentino, dapat nga proactive ang Department of Trade and Industry (DTI) kag ang DA sa pagpahagan-hagan sang epekto sang El Niño.
As of May 2, base sa government data, ang El Niño phenomenon ang nakabilin na sang P5.9 billion nga balor sang kahalitan sa sector sang agrikultura kun sa diin ang humay amo ang pinaka-apektado nga nagdangat sa P3.1 billion sa damage.
Ang tatlo sa pinakaapektado nga mga rehiyon amo ang Mimaropa, ang Cordillera Administrative Region, kag ang Western Visayas.#
