Torre, ginkadlawan lang ang akusasyon nga gintuyo niya nga pahipuson ang ‘ex-marines’

Ginkadlawan lamang ni Metro Manila Development Authority (MMDA) General Manager kag former Philippine National Police (PNP) Chief General Nicolas Torre III ang paglawag sang iya pangalan nga isa sa ginaalegar nagpangaluyag sa “former marines” agud nga indi sila magkanta sa isyu sang flood control scandal.

Ini ang kasunod sa natabo sa hearing sang Senate Blue Ribbon Committee kahapon, Hunyo 4, kun sa diin ang isa ka testigo nga nagpakilala bilang anay marine nga si Benny Bulontate ang nag-alegar nga siya kag ang iya mga kaupod ginpalapitan sang pila ka mga tawo lakip na si Torre kag gina-alegar nagtinguha sa pagkumbinse sa ila nga indi pagsuportahan ukon kumpirmahon ang mga pahayag sang missing witness kag anay marine nga si Orly Guteza.

Sa pagbisita naman ni Torre sa Iloilo City, sang ginpamangkot siya sang iya reaksyon, ginkwestyon sini kun paano niya mahimo punggan ang statement sang mga marine kun wala niya gani napunggan nga i-relieve siya sa pwesto bilang hepe sang PNP.

Agusto 2025 sang na-relieve si Torre bilang PNP chief.

Na-mensyonar sini nga natawagan siya anay ni Father Flaviano “Flavie” Villanueva kasunod sang pagpalapit ni former Public Works undersecretary Roberto Bernardo sa simbahan kag nagapangayo sang assistance kag proteksyon.

Si Bernardo amo ang nag-implicate sang high-ranking government officials sa alleged multi-billion-peso flood control kickback scheme kadungan sang Blue Ribbon hearings sang nagligad nga tuig.

Sang amo nga tion, suno kay Torre, nag-advise siya kay Bernardo nga maghingyo nga magsulod sa Witness Protection Program (WPP) sang gobyerno para sa proteksyon nga kinahanglan sini.

Pahayag pa ni Torre, indi sini personal nga kilala ang ex-marines.

Ang nadumduman lang niya suno kay Torre amo nga nagapangayo ini nga ex-marines sang proteksyon bangud ginaalegar nga may mga nagapangita sa ila, apang nakita man sini nga “dishonorable” sila nga nagaserbe nga security sang pila ka mga pulitiko.

Kahapon, personal nga nag-abot sa Senado ang 18 alleged former Marines nga nagaalegar nga “bagmen” anay sila ni former Rep. Zaldy Co.

Ang nagpanguna sa hearing kahapon amo ang kampo ni Senator Alan Peter Cayetano.

Imbitado liwat ang “ex marines” sa isa pa ka Senate blue ribbon committee hearing sa Lunes, Hunyo 8, sa pagpanguna naman ni newly elected chairperson Sen. Erwin Tulfo nga halin sa Gatchalian bloc sa upper chamber.#