Ginpasakaan na sang kaso nga negligent homicide ang stationmaster sa Greece nga amo ang ginabasol sa pinakamamatay nga train crash sa amo nga pungsod nga ginkamatay sang 57 ka mga tawo.
Matandaan nga nagbungguanay ang northbound passenger train kag ang southbound freight train sa syudad sang Larissa sa central Greece sang tinalikdan nga semana.
‘Tragic human error’ ang ginatudlo nga rason.
Gina-alegar nga ang 59-anyos nga station master ang nagmandu sa duha ka tren nga mag-agi sa isa lang ka track apisar nga halin sila sa lain nga direksyon.
Kun ma-convict, mapreso ang station master sa sulod sang 10 ka tuig.
Si Greek Prime Minister Kyriakos Mitsotakis ang nagpangayo naman sang pasaylo sa mga pamilya sang mga biktima.
Halin sang natabo ang pagbungguanay sang tren, linibo man nga mga residente ang nagsulong sa kapital nga syudad sa Athens agud mag-protesta bangud sa kaakig sa gobyerno. ##
