Transport group sa Iloilo City,hulaton anay nga maglab-ot sa P90 ang presyo sang gatong antes dayunon ang fare hike petition

ILOILO CITY- Sustiniron lang anay sang transport group sa Iloilo City ang pagtaas na naman sang presyo sang gatong.

Epektibo buwas nga adlaw, lauman sang mga motorista ang pagsaka sa presyo sang diesel sang masobra P6.00 per liter samtang P1.40 naman sa gasolina.

Sa interview sang Bombo Radyo kay Mr. Raymundo Boyet Parcon, presidente sang Iloilo City Loop Alliance of Jeepney Operators and Drivers Association (ICLAJODA) kag chairman sang Western Visayas Transport Cooperative (WVTC), iya ginpahayag nga sa subong, samtang yara pa lang sa 70 tubtob 79 pesos ang litro sang diesel,indi anay sila magpasaka sang petition para sa fare hike.

Apang suno kay Parcon, sa tion nga mangin dalayon ang pagtimbuok sa presyo sang gatong kag maglab-ot sa P90, amo kag dayunon nila ang petition para sa pagpataas sang pletehan.