ILOILO CITY – Ginakabig ni Iloilo City Mayor Jerry Treñas nga wala pulos ang paggamit sa opisina sang gobyerno agud mang-ipit sang kasumpong sa pulitika.
Sa interview sang Bombo Radyo kay Treñas, mabaskog niya nga ginpahayag nga may yara sa gihapon sang mga empleyado nga nagapahilabot sa pulitika.
Indi matulon suno kay Treñas ang ginahimo sa iya ni anay City Engineers Head Engr. Bobby Divinagracia paagi samasami nga pag-usisa sang occupancy permit sang negosyo sang iya tiayon.
Ginpahayag ni Treñas nga indi siya makahangop kun bala nanamian lang si Divinagracia sa iya ginabuhat apang ginpahayag sang alkalde nga nag-umpisa lang ini sang tion sang eleksyon.
Ginpahayag ni Treñas nga tubtob sa iya kamatayon, indi niya malipatan ang ginahimo ni Divinagracia.
Nahibaluan nga on-leave subong ang status ni Divinagracia apang gin-athag ni Trenas nga handa siya nga istoryahon ang City Engineer sa tion nga makabalik na sa trabaho.
Samtang, nagpaandam si Treñas sa duha ka department heads nga wala nagatambong sang meeting sa Iloilo City Hall sumugod sang siya ang nagpungko sa pwesto.
Suno kay Treñas, wala sang rason kag indi siya magbaton sang ano man nga ihatag nga rason kun nga-a wala nagatambong sa pagsinapol ang duha ka department head.
Malawig na suno kay Treñas ang tion nga iya nahatag apang tubtob subong, wala gihapon nagatambong ang wala na ginhingadlan nga mga empleyado.
Ginpahayag man sang alkalde nga indi paghatagan sang budget ang mga departamento nga ginapamunu-an sang duha.
Indi eskwelahan ang Iloilo City Hall suno sa natungdan nga mahimo ma-excuse ukon mag-absent ang empleyado nga wala man lang sang rason.
