ILOILO CITY- Wala nakaluwas sa masipat nga mata sang mga Ilonggo ang paglabay sang truck sang Iloilo City Government sa bike lane nga para lang kuntani sa mga bikers.
Nakuhaan pa sang video ang amo nga insidente.
Kasunod sang paglapta sang video, gin-ako sang Officer in Charge sang Beautification Division nga ila truck ang nasiplatan nga naggamit sang bike lane sa Diversion Road.
Sa interview sang Bombo Radyo kay Engineer Neil Ravena, iya ginpahayag nga ginpatawag na ang driver sang truck matapos makabaton sang impormasyon halin sa alkalde.
Suno kay Ravena, nagpaathag ang driver nga naghakwat lamang ang truck sang mga sako nga may unod nga balas kag bato bangud nga may mga aktibidad ang talatapan nga gina-ubra sa area lakip diri ang pag-ilis sang duta.
Ginklaro man sang natungdan nga wala gin-terminate ukon gin-suspend ang driver.
Nagpagwa naman ini sang office order para sa mga drivers sa idalom sang iya pagdumala nga dapat indi na maliwat ang kapareho nga insidente.
Natalana naman nga mag- atubang ang driver kay Mayor Treñas agud personal niya nga masugilanon.
Sa subong, naka -work from home ang alkalde bangud sa problema sa ikaayong lawas.
