Indi lang si US President Donald Trump ang target sang suspek sa pagpangluthang sa White House Correspondents’ Dinner sa isa ka hotel sa Washington D.C. kundi pati ang mga opisyal sang iya administrasyon.
Suno ini kay acting US Attorney General Todd Blanche matapos ang shooting incident nga natabo sang pasado alas sais sang Sabado sang gab-i oras sa Washington.
Ginhingadlan sang US media ang suspek nga si Cole Tomas Allen, 31-anyos, nga arestado na subong matapos nagpalupok malapit sa security checkpoint kadungan sang event kun sa diin yara mismo si Trump, si First Lady Melania Trump, Vice President JD Vance, Secretary of War Pete Hegseth, kag iban pa nga high-ranking officials.
Gina-imbestigaran pa ang motibo sang suspek, apang suno kay Blanche, sandig sa “preliminary” findings, target ni Allen ang administration officials.
“I kept it a little general because we do believe it was administration officials,” suno kay Blanche. “Obviously, President Trump is a member of the administration, the head of it, but, but as far as exacting threats that may have been communicated beforehand, we’re still actively investigating that evidence.”
Nagapangamot sa imbestigasyon ang criminal division kag terrorism task-force sang Federal Bureau of Investigation (FBI).
Nahibaluan nga matapos nabatian ang lupok, gilayon nga gintabunan si Trump kag gin-evacuate pagguwa sa hulot amo man ang First Lady kag si Vance.
Gin-insister pa anay ni Trump nga magpabilin lang sa dinner matapos nga naaresto naman ang suspek, apang ginhingyo siya sang law enforcement amo man ang iban nga administration officials nga magbiya anay sa lugar.
Ginkumpirma man sang presidente nga isa ka officer sang U.S. Secret Service ang natiruhan apang nakaluwas bangud sang iya ginasuksok nga bulletproof vest.#
