Mas nagapalapit pa si anay US President Donald Trump sa presidential nomination sang Republican Party matapos sini ginlutos ang kasumpong nga si Nikki Haley sa iya mismo home state sa South Carolina.
Nagdaog ang 77-anyos nga anay presidente nga may 20-point margin batok kay Haley nga isa anay ka United Nations ambassador kag two-term governor sang South Carolina halin sang 2011 tubtub sang 2017.
Ini na ang ikapaat nga sunod-sunod nga kadalag-an ni Trump matapos nga nakuha man ang kadam-an sang mga boto sa estado sang Iowa, New Hampshire, kag Nevada.
Apisar sini nga kalutusan, nagpasalig si Haley bilang nabilin nga challenger ni Trump nga magapadayon ini sa pagpangampanya tubtub sa Super Tuesday ukon sa Marso 5 kun sa diin magaboto ang mga botante sa 16 ka states sa sulod lamang sang isa ka adlaw.
“There are huge numbers of voters in our Republican primaries who are saying they want an alternative. I’m not giving up this fight when a majority of Americans disapprove of both Donald Trump and Joe Biden,” suno kay Haley.
Sa victory speech naman ni Trump, wala na sini gin-mensyonar si Haley bangud mas nakatutok na ini sa general election nga matabo sa Nobyembre kun sa diin daku ang posibilidad nga may rematch sila ni US President Joe Biden.
Liwat nga ginpasalig ni Trump nga palayason sini ang Democrat nga si Biden sa White House.
“We’re going to look Joe Biden right in the eye. He’s destroying our country – and we’re going to say ‘get out Joe, you’re fired’,” pahayag ni Trump.
Ginsiling man sini nga subong pa lang sini na kita kun daw ano ka pag-on ang pag-isa sang Republican Party: “I just want to say that I have never seen the Republican party so unified as it is right now. This is a fantastic evening. It’s an early evening, and fantastic.”#
