Aprubado na sa United Nations General Assembly ang nonbinding resolution nga nagapanawagan sa Russia nga mag-withdraw na sang tropa sang militar sa Ukraine.
141-7 ang resuta sang binotohay nga may 32 ka abstentions.
Lakip sa 141 nga nag-boto pabor sa resolusyon amo ang Pilipinas. Ang mga nagpamatok naman amo ang Russia, Belarus, North Korea, Syria, Mali, Eritrea kag Nicaragua.
Sa 32 nga nag-abstain, lakip sa talalupangdon amo ang China, India, South Africa, Pakistan, Sri Lanka, kag iban pa nga yara sa Africa kag Central Asia.
Ang General Assembly amo ang pinaka-importante nga U.N. body nga may makahambal kaangot sa isyu sa Ukraine bangud kun matandaan, na-paralyze ang Security Council paagi sa veto power sang Russia.
Matandaan nga Pebrero 24, 2022 ukon eksakto isa ka tuig na sang nagpadala si Russian President Vladimir Putin sang 200,000 ka mga Russian soldiers sa Ukraine kag gintawag ini nga special military operation.
Ang amo nga hitabo ang ginakabig pinakadaku nga invasion sa Europa halin sang natapos ang World War II.
7,199 ang napatay kag linibo ang pilason sa away sang duha ka pungsod suno sa United Nations, apang ginapatihan nga mas mataas diri ang matuod nga numero.
Sa syudad sang Mariupol sa Ukraine kun sa diin gin-alegar natabo ang mass execution, ginpahayag sang alkalde nga 21,000 ang nagkalamatay bangud sa pagpang-atake sang Russia.
Suno naman sa militar sang Estados Unidos sang Amerika, ginabanta 100,000 ka mga soldado halin mismo sa Ukraine kag Russia ang napatay sa away halin sang nagligad nga tuig. ##
