Gin-veto na naman sang Estados Unidos sang Amerika ang draft resolution sang United Nations Security Council kaangot sa Israel-Hamas war.
Paagi sa sini nga tikang, ginabalabagan sang Amerika ang demand sa immediate humanitarian ceasefire bangud ang mas ginaduso sini sa 15-member body amo ang temporaryo nga ceasefire.
13 ka mga council members ang nagboto-pabor sa amo nga draft nga himo sang Algeria; samtang nag-abstain naman ang Britanya.
Ini na ang ikatatlo nga tion nga nag-veto ang Estados Unidos sang Amerika halin sang natabo ang gyera sa Gaza.
Para kuntani nga maadoptar ang isa ka UN Security Council resolution, dapat nga makakuha ini sang at least siyam ka mga boto nga naga-pabor kag dapat nga indi ini pag-i-veto sang sin-o man sa lima ka mga permanent members nga amo ang United States, United Kingdom, France, Russia, kag China.
Suno kay US Ambassador to the UN Linda Thomas-Greenfield, una na nga nag-signal ang Estados Unidos nga iga-veto nila ang resolution bangud posible ini nga makabalabag sa mga istoryahanay subong sang US, Egypt, Israel kag Qatar para sa temporary ceasefire kag pagpaguwa sang hostages nga gindala sang Hamas sa Gaza Strip.
“Any action this council takes right now should help, not hinder these sensitive, and ongoing negotiations. And we believe that the resolution on the table right now would, in fact, negatively impact those negotiations,” pahayag ni Thomas-Greenfield sa atubang sang council.” Demanding an immediate, unconditional ceasefire without an agreement requiring Hamas to release the hostages will not bring about a durable peace. Instead, it could extend the fighting between Hamas and Israel.”
Matandaan nga may yara man sang resolution nga gin-file ang US kun sa diin nagapanawagan ini sang temporaryo nga ceasefire kag nagapamalabag sa opensiba sang Israel sa Rafah kun sa diin may masobra isa ka milyon nga mga sibilyan.
Ini na ang ikaduha nga tion halin sang Oktubre 2023 nga nag-duso ang US sang Security Council resolution sa Gaza. Ang una sini nga resolution ang ginbalabagan sang Russia kag China.#
(Mike Segar/Reuters via CNN)
