ILOILO CITY – Nangin madinalag-on ang pagpatuman sang una nga adlaw sang weekend block off sa syudad sang Iloilo.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga dako ang nangin deperensya kun ipaanggid sang una nga wala pa napatuman ang Expanded Enhanced Community Quarantine.
Suno kay Conlu, apisar nga may yara sila sang mga nadakpan apang mas madamo sa gihapon ang mga pumuluyo nga nagsunod kag mas ginpili nga magpabilin sa ila tagsa ka panimalay ilabi na paglampas sa 3:00 sang hapon.
Suno kay Conlu, sugod subong nga adlaw, Abril 19, pagadakpon kag hatagan sang ticket ang mga pribado nga salakyan nga wala sang Unified Quarantine Pass.
Gin-athag naman ni Conlu nga ginabaton sa gihapon ang daan nga quarantine pass bangud wala pa naubos sa pagpanghatag ang Unified Quarantine Pass.
Apisar nga may yara na sang Unified Quarantine Pass, ginadumilian sa gihapon ang pagguwa paglampas sang 3:00 sa hapon magluwas lang kun magpadulong sa hospital ukon magbakal sang bulong sa botika.
Nalab-ot naman sang Iloilo City Police Office ang ila katuyuan sa pagpatuman sang weekend block off.
Sa interview sang Bombo Radyo kay Police Capt. Shella Mae Sangrines, tagapamaba sang Iloilo City Police Office, iya ginpahayag nga nakita niya ang nangin pagbag-o sa syudad sang Iloilo kadungan sang una nga adlaw sang pagpatuman sang weekend block off.
Suno kay Sangrines, ginakabig niya nga madinalag-on ang una nga adlaw sang pagpatuman sang weekend block off bangud sa kooperasyon sang tanan.
Nagalaum ang natungdan nga magapadayon pa ini sa mga masunod nga semana.
Mas nangin matawhay naman ang sitwasyon sa mga merkado sa syudad sang Iloilo ilabi na sa Iloilo Terminal Market.
Sa interview sang Bombo Radyo kay Ariel Castañeda, pinuno sang Local Economic and Enterprise Office, iya ginpahayag nga nangin epektibo ang una nga adlaw sang pagpatuman sang Expanded Enhanced Community Quarantine.
Suno kay Castañeda, ginatinghuaan niya nga mas hugtan pa ang pagpatuman sang mga lihok kag pasulundan may kaangtanan sa pagguwa kag pagsulod sang mga manugbakal sa Iloilo Terminal Market.
Ginpahayag ni Castañeda nga nagapati siya nga bastante na ang ginhatag nga tiyempo nga 9:00 sa aga tubtub 3:00 sa hapon agud makapamakal ang mga pumuluyo sang ila kinahanglanon.
