ILOILO CITY- Buksan na halin Lunes tubtob Domingo ang Ungka Flyover para sa mga motorista apang may yara lang sa gihapon sang pili nga oras.
Sa interview sang Bombo Radyo kay Iloilo 2nd District Representative Michael Gorriceta, iya ginpahayag nga ang nangin desisyon sang Department of Public Works and Highways ang kasunod man sang hingyo niya kag sang municipal officials sang Pavia, Iloilo nga palawigon ang pagbukas sang flyover agud nga indi tuman nga magpug-ok ang trapiko halin sa kabanwahanan sa probinsya padulong sa syudad sang iloilo kag vice versa.
Suno sa mamalidha, maumpisa ang pagbukas sang flyover las-6 sang aga tubtob las-10 sang aga kag las-2 sang hapon tubtob las-9 sang gab-i.
Buot silingon, gin-extend sang isa ka oras ang pagbukas sang flyover sa aga samtang ginpatemprano naman sang duha ka oras ang pagbukas sa hapon kag gin-extend sang isa ka oras sa gab-i.
Pahayag ni Cong. Gorriceta, maayo ini nga desisyon sang ahensya bangud madamo gid subong sang tawo nga nagaguwa-sulod sa syudad kag sa probinsya sang Iloilo may kaangtanan sa holiday season.
Indi pa mapat-od sang mamalidha kun tubtob san-o ang extension sang oras kag adlaw sang pagbukas sang flyover bangud sa tion nga makapaguwa na sang pondo para sa rectification, posible nga isirado ang Ungka flyover.
