Ginatun-an sang University of the Philippines – Visayas (UPV) Center for West Visayan Culture ang pag-preserve kag pagbutang sang general standards sa kilala nga batchoy sang Iloilo.
Sa interview sang Bombo Radyo kay Lea Lara, Director sang Iloilo City Meetings, Incentives, Conferences, Exhibitions Center, iya ginpahayag nga ang pagtuon ang lakipan sang patigayonon nga survery, kon sa diin, tipunon ang mga restaurant nga nagaserbe sang batchoy.
Suno kay Lara, paagi sa survey, pamangkuton ang mga nagapanag-iya sang isa ka batchoyan kon ano ang mga pagpanghangkat nga ila ginapangatubang sa ila pagbaligya sang batchoy.
Luyag man nila nga mag-contribute sa gastronomy sang syudad paagi sa panalawsaw.
Nagalaum man ini nga ang pagtuon ang magahatag sang pagkilala sa matuod-tuod nga sabor ukon damil sang batchoy, kag pagpasanyog sang gastronomic identity sang syudad sang Iloilo.
Gin-athag man sang natungdan nga libre kag wala sang gastuhon ang city government sa ginaduso nga tikang sang unibersidad.
Nahibaluan nga kahapon nga adlaw, ginpirmahan sang Iloilo City local government unit (LGU) paagi kay Mayor Jerry Treñas, samtang si Chancellor Clement C. Camposano sa bahin sang University of the Philippines Visayas ang memorandum of agreement (MOA) nga may tinutuyo nga maghatag sang importansya sa chain practices kag resource management sang batchoy production.
