Ginbawian gid sang kabuhi ang isa ka aktibo nga myembro sang United States Air Force matapos nga ginsunog sini ang iya kaugalingon sa guwa sang embahada sang Israel sa Estados Unidos sang Amerika.
Ginkilala ini nga si Aaron Bushnell, 25, sang San Antonio, Texas.
Naga-guwa sa inisyal nga impormasyon nga hungod nga ginkuhaan sang video sang amo nga lalaki ang iya nga pag-protesta kag gin-livestream ini sa social media platform nga Twitch.
Makit-an sa video nga nagalakat ang lalaki padulong sa Israeli Embassy sa Washington kag mabatian man ang iya pahayag nga: “I will no longer be complicit in genocide. I am about to engage in an extreme act of protest.”
Ang “genocide” amo man ang termino nga gingamit sang pila ka world leaders sa paglaragway sang ginahimo sang Israel sa binulan nga pagpang-atake sini sa Gaza kun sa diin masobra na sa 29,000 ang nagkalamatay.
Sunod nga ginbutang sang lalaki ang recording device sa duta antes ginbubuan sang likido ang iya lawas kag sulit-sulit nga nagsinggit sang “Free Palestine!”
Sunod ini nga natumba kag nagdali-dali naman ang mga pulis kag otoridad nga patyon ang kalayo gamit ang fire extinguishers.
Ginhingagaw dala sang DC Fire and emergency services ang lalaki sa local hospital apang bangud sa seryoso nga mga samad nga iya naangkon, ginbawian gid ini sang kabuhi suno sa Metropolitan Police Department.
Nagatrabaho na subong ang hanay sang kapulisan kag ang US Secret Service kag Bureau of Alcohol, Tobacco, Firearms and Explosives agud nga maimbestigaran ang natabo.
Ginkumpirma man sang spokesperson sang Israeli Embassy nga kumpleto ang ila nga staff kag wala sang nahalitan.
Oktubre 7 sang nag-atake ang Hamas militants sa southern Israel kun sa diin yara sa 1,200 ang napatay kag ginatos ang ginbihag. Nagtimalos ang Israel, ginsakop ang Gaza nga sakop sang Palestine, ginpromisa nga pulbuson ang Hamas, kag tubtub subong, nagapadayon ang pag-atake apisar sang linibo ka mga sibilyan nga nagkalamatay. #
