Gin-umpisahan sang South Korea kag Estados Unidos sang Amerika ang live-fire exercises malapit sa border sa North Korea.
Halos 2,500 ka tropa halin sa duha ka nasambit nga pungsod ang nag-upod sa exercises kag lauman nga pagasundan ini sang apat pa ka beses halin subong tubtub sa Hunyo.
Gintawag ini nga “Combined annihilation firepower drills” kag ginakabig pinakadaku nga military exercise sang duha ka pungsod. Ginpakita man diri ang 610 ka weapons systems kaangay sang fighter jets, attack helicopters, drones, tanks kag artillery halin sa Seoul kag Washington.
Suno sa defense ministry sang South Korea, ginapakita sini nga exercise ang kapasidad sang militar sang Amerika kag South Korea agud nga magbato sa nuclear kag missile threats sang North Korea kag mangin sa ila nga full-scale attack.
Matandaan nga sang nagligad nga semana, gin-report sang state media sa Pyongyang nga gin-aprubahan na sang lider nga si Kim Jong Un ang pinal nga preparasyon para sa paglunsar sang labing-una nga military spy satellite sang North Korea. Ini suno kay Kim ang magabato naman sa pagpamahog sang US kag South Korea. #
