Suportado ni US President Joe Biden ang iban nga mga pungsod nga nagtinguha nga mapa-hanas ang Ukrainian pilots sa mas moderno nga fighter aircraft lakip na sa F-16 fighter jets.
Ginpahibalo ini ni Biden kadungan sang summit sang Group of Seven (G7) Leaders sa Hiroshima nga ginabug-usan sang United States, Japan, Germany, United Kingdom, France, Canada, kag Italy.
Matabo ang training sa guwa sang Ukraine ukon sa site sa Europa kag ginalauman nga binulan pa antes ini matapos. Ginalauman man nga sa masunod nga semana magaumpisa ang paghanas sa mga piloto.
Ini nga tikang ang ginalauman nga magaresulta sa pagpadala sang dugang nga mas abanse kag mas dalagku nga Western fighter jets sa Ukraine.
Gin-abi abi naman ni Ukrainian president Volodymyr Zelenskiy ini nga development: “I welcome the historic decision of the United States and @POTUS to support an international fighter jet coalition. This will greatly enhance our army in the sky. I count on discussing the practical implementation of this decision at the #G7 summit in Hiroshima.”
Nahibaluan nga wala pa sang Western-designed jets sa Ukraine. Nagapati ang Kyiv nga mas epektibo ang F-16s ipaanggid sa Soviet-era fighters nga ginagamit sini subong.
Ang Poland kag Slovakia ang nakahatag naman sang 27 ka MiG-29s sa Ukraine.
Samtang, suno kay Bombo Josel Palma, international correspondent sa Japan, ginalauman nga buwas nga adlaw man ang in-person attendance ni Zelensky sa amo nga summit kag ginalauman man nga magapanawagan ini sang dugang nga military aid.
Kun madayon ang pagtambong ni Zelensky, ini ang iya mangin una nga byahe sa Asya halin sang ginpatigayon ni Russian President Vladimir Putin ang full-scale invasion sa Ukraine sang Pebrero 2022. #
