Wala napasar ang resolution nga ginduso sang Estados Unidos sang Amerika sa United Nations Security Council agud magpanawagan sang immediate ceasefire sa gyera sa tunga sang Israel kag Hamas sa Gaza.
Ini matapos nga ginlababagan ini sang duha ka permanent members sang council nga amo ang China kag Russia, kag nagpamatok man pati ang Algeria nga amo ang Arab representative sa amo nga organisasyon.
11 naman ang nagboto-pabor halin sa 15-member na security council samtang nag-abstain naman ang Guyana.
Para kuntani nga maadoptar ang isa ka UN Security Council resolution, dapat nga makakuha ini sang (at least) siyam ka mga boto nga naga-pabor kag dapat nga indi ini pag-i-veto sang sin-o man sa lima ka mga permanent members nga amo ang United States, United Kingdom, France, Russia, kag China.
Ginpakamalaot naman ni U.S. ambassador to the U.N. Linda Thomas-Greenfield ang pag-veto sang China kag Russia kun sa diin iya man ginsaad nga halin sang natabo ang pag-atake sang Hamas sang Oktubre 7, 2023, wala gid ginkondenar sang duha ka pungsod ang ginhimo sang militante nga grupo.
Indi pa maathag kun may masunod pa nga botohay nga matabo apang nagpasalig man una ang France nga magabalay man ini sang kaangay nga resolution para magduso sang ceasefire pananglitan mapaslawan ang resolution sang Estados Unidos sang Amerika.
Ini na ang ikaapat nga tion nga gintuyo kuntani nga magpasar sang cease-fire resolution sa council apang lunsay napasalawan. Ang Estados Unidos ang nag-veto man sang nauna nga tatlo ka resolutions.
Nahibaluan nga halin sang nagtimalos ang Israel sa pag-atake sang Hamas sa southern Israel sang Oktubre, nagdangat na sa 32,000 ka Palestinians ang nagkalamatay didto sa Gaza nga amo ang teritoryo sang militante nga grupo.#
