Magalawig sang duha tubtob tatlo ka bulan ang pag-freeze sang US Agency for International Development (USAID) sa mga proyekto sa Iloilo City.
Sa interview sang Bombo Radyo kay Engr. Niel Ravena, head sang Iloilo City Environment and Natural Resources Office kag General Services Office, iya ginpahayag nga ini matapos nga nagmando ang United States Department of State nga i-freeze ang tanan nga mga assistance kag aid packages sa nagkalain-lain nga pungsod.
Ang pahayag ni Ravena ang kasunod man sang ginpagwa man nga internal memo ni US Secretary of State Marco Rubio nga kinahanglan pa anay sang Department nga tun-an kag aprubahan ang bag-o nga mga alokasyon ukon extensions sang existing aid packages sa iban nga pungsod.
Ginpahayag sang natungdan nga may mga proyekto sa syudad nga pat-od nga maapektuhan sang mando ni US President Donald Trump nga unahon anay nga buligan ang mga pumuluyo sang Amerika.
Sa subong, wala pa sang pat-od nga data kun pila ang ginalauman nga madula nga ayuda sa Pilipinas bangud sa nasambit nga polisa sang Trump administration.
Nahibaluan nga sang 2024, nagpain ang USAID sang $9.27 million ukon P542.4 million sa Pilipinas para sa disaster relief items, management sa emergency shelters, kag iban pa sa diin nalakip na diri ang Iloilo City.
