Napatay ang video journalist sang Reuters kag nasamaran ang anum ka iban pa nga katapo sang media sa Southern Lebanon matapos naigu sang missile nga ginapahayag ginpalupad halin sa direksyon sang Israel.
Ginkumpirma man sang international news agency nga ang ila empleyado nga nagtaliwan amo si Issam Abdallah nga sang amo nga tion naga-hatag sang live video signal para sa broadcasters.
Suno sa reports, nagatutok ang camera sa nabukid nga area sang hinali lang, may tuman ka tunog nga lupok, nag-uyog ang camera, napuno sang aso ang palibot kag ang sunod nga nabatian amo ang mga singgit kag paghilibion.
Ang duha ka iban pa nga Reuters journalists nga sanday Thaer Al-Sudani kag Maher Nazeh ang lakip sa nasamaran sa insidente kag nakaguwa na sa ospital matapos nadapatan sang pagbulong.
Suno kay Nazeh, nagakuha sang footages ang Reuters kag ang duha ka iban pa nga news organizations sa missile fire nga halin sa Israel sang hinali lang, naigu si Abdallah samtang nagapangabudlay ini sa pagpungko sa manubo nga pader.
Pila ka segundos ang nagligad, may isa pa ka missile nga nag-igu sa salakyan nga ginagamit sang grupo sang mga katapo sang media rason nga nag-ibwal ang kalayo.
Suno sa Agence France-Presse, duha sa ila nga journalists ang napilasan, samtang ang Qatari-funded broadcaster nga Al Jazeera ang nagkumpirma nga may empleyado man sila nga nakaangkon sang injuries.
Kasunod sang hitabo, ginbasol ni Lebanese Prime Minister Najib Mikati ang Israel. Ginahulat man kun may ipagwa nga statement ang Israel Defense Forces.
Pahayag naman sang UN envoy sang Israel nga si Gilad Erdan: “Obviously, we would never want to hit or kill or shoot any journalist that is doing its job. But you know, we’re in a state of war, things might happen.” Ginpasalig sini nga maga-imbestigar ang ila nga pungsod. #
