ILOILO CITY – Nagpakig-angot na ang Iloilo City Police Office (ICPO) sa cybercrime division sang Police Regional Office (PRO) VI agud makakas sa social media platforms kag maimbestigaran kun sin-o ang nag-upload sang video nga nagpangalan sa mga pulis nga amo ang ginapahayag yara sa likod sang wala nasolbar nga mga kaso sang pagpamatay sang riding-in-tandem suspects.
Ang video ang gin-post sa Youtube sang Marso 2, 2021 kag may tig-ulo nga Iloilo City Riding in Tandem Killings.
Sa amo nga video, ginakwestyon kun safe pa bala ang pagpuyo ukon pagtinir sa syudad sang Iloilo kag kun ano ang ginahimo sang pulis sa kaangay man nga pulis nga inlvolved sa krimen.
Apat ka mga biktima ang ginpakilala nga amo sanday:
- Roy Goco, ginpatay sang Setyembre 18, 2019 sa Lapuz Sur
- Felix Argenal Jr., ginpatay sang Oktubre 19, 2019 sa Gonzales Avenue, Brgy. Tabuc Suba, Jaro
- anay barangay kagawad sang Bakhaw, Mandurriao nga si Virgilio Soledad, ginpatay sang Disyembre 26, 2019 sa Barangay Poblacion, Leganes
- Allain Muller, ginpatay sang Enero 19, 2020 sa Barangay Nabitasan, La Paz
Sa amo man nga video, ginhingadlan kag ginbutang ang laragway sang mga pulis nga amo ang ginaalegar perpetrators kag involved man sa illegal drugs, kidnapping, kag extortion.
Ini nga mga pulis amo sanday:
- Police Staff Sergeant Ricardo Morante
- Police Master Sergeant Vernie Escorial
- Police Staff Sergeant Melbert Niño
- Police Staff Sergeant Rodel Paulan
- Police Staff Sergeant Michael De Felipe
- Police Staff Sergeant Freddie Libo-on
- Police Corporal Dinaree Sia
Sa interview sang Bombo Radyo kay Police Colonel Uldarico Garbanzos, director sang Iloilo City Police Office, iya ginpahayag nga lunsay naka-assign bilang anti-illegal drug operators ang nasambit nga mga pulis apang subong yara na sa Regional Personnel Holding and Accounting Unit (RPHAU) sang PRO VI.
Ang isa ka nahingadlan nga pulis ang nagatrabaho pa sa General Services Office sang ICPO.
Suno kay Garbanzos, character assassination ang ginhimo sang video uploader ukon isa ka malisyoso nga paagi agud gub-on ang hanay sang PNP ilabi na ang namensyonar nga mga persona.
Ginpahayag ni Garbanzos nga magluwas nga naguba ang propesyon, daku man ang epekto sini sa pamilya sang mga pulis.
Ginkumpirma naman sang PRO VI spokesperson nga si Pol. Lt. Col. Joem Malong nga assigned na sa RPHAU ang mga nasambit nga pulis.
Sa interview sang Bombo Radyo kay Malong, iya ginpahayag nga sa subong, wala pa sang kaso nga napasaka batok sa ginhingadlan nga mga pulis gani indi pa sila makabig nga guilty sa akusasyon.
Ang National Bureau of Investigation (NBI) suno kay Malong ang naga-imbestigar sa apat ka mga pulis nga yara man sa amo nga video.
Gin-ugyunan man ni Malong ang pahayag ni Police Col. Garbanzos nga malisyoso ang paagi sa pag-tag sa mga pulis bilang mga suspek.
Sa bahin sang PNP suno kay Malong, bug-os ang ila paninguha ang masolbar ang mga kaso sang motorcycle-riding incidents bangud sa pagkamatuod, naga-reflect man sa ila nga performances kun indi masolbar ini nga mga kaso sang pagpamatay.
Sa subong, santo sa record sang Crime Incident Analysis System sang ICPO, may yara sang 56 ka wala nasolbar sang kaso sang riding-in-tandem killings sa syudad sang Iloilo halin sang Enero 1, 2016 tubtob Disyembre 31, 2020.
Sa sini nga mga kaso, 21 ang natabo sa distrito sang Jaro, 12 sa La Paz, 8 sa Molo, 6 sa Mandurriao, 5 sa Arevalo, kag 4 sa Iloilo City Proper.
