ILOILO CITY- Nagnubo ang natipon sang syudad nga basura sa Iloilo City Proper ilabi na sa downtown area kadungan sang imbukada sang 2024.
Sa interview sang Bombo Radyo kay Engr. Neil Ravena, head sang Iloilo City Environment and Natural Resources Office, iya ginpahayag nga apat lamang ka mga trucks ang ila gin-utilize sa paghakot sang basura.
Suno kay Ravena, halos katunga gid ang ginbuhin sang volume subong nga tuig kun ipaanggid sa nagligad nga tuig nga walo gid ka trucks ang naghakot.
Dako naman ang pagpasalamat ni Ravena sa tanan nga street sweepers nga dako ang gintungdan agud matipon ang mga basura kag mahakot agud ma-dispose gilayon.
Matandaan nga ginlauman na ang madamo nga basura matapos ginpatuman ang open sidewalk vending sa bilog nga Disyembre agud mahatagan kahigayunan ang mga sidewalk vendors nga makadawa-dawa sa ila kita kadungan sang holidays.
