ILOILO CITY – Subong na nga adlaw, Hulyo 23 ang katapusan nga adlaw sang voter’s registration para sa barangay kag Sangguniang Kabataan (SK) elections.
Suno kay Atty. John Rex Laudiangco, acting spokesperson sang Commission on Elections (COMELEC), wala na sang extension sang registration magluwas gid lamang kun may yara sang layi nga ipasar ang kongreso nga nagapalawig sini.
Samtang, ginpahayag man sang natungdan nga nalapawan na ang numero sang mga nagparehistro sa target sang poll body.
Sa data sang COMELEC as of July 20, nagdangat na sa 2,119,878 ang nakatigayon nga makaparehistro.
Dugang pa sang natungdan, ang ila nga ginalauman nga numero sang mga magaparehistro ang magadangat gid lamang sa ginabanta isa ka milyon nga mga bag-o nga mga botante.
Nahibaluan, pila ka mga mamalidha ang nagaduso nga ipa-iway anay ang eleksyon sa Disyembre 5 kag sayluhon sa masunod nga tuig.
Ini bangud nga mas kinahanglan ang P8 billion para sa liwat nga pagsaka sang kaso sang COVID-19 sa pungsod.
Apang suno kay presumptive Senate President Juan Miguel Zubiri, hulaton nila anay nga matapos ang labing una nga State of the Nation Address (SONA) ni President Ferdinand “Bongbong” Marcos Jr. antes pa man nga magpagwa sang desisyon angut sa pagpa-iway sang eleksyon.
