ILOILO CITY- Gin-ako ni Vice President Sara Duterte nga nakabaton siya sang legal advice sa posible nga kaso nga ipasaka batok sa iya sa International Criminal Court (ICC).
Apang suno sa Vice-President,wala ini nabalaka sa mga espekulasyon nga siya ang isa sa “secondary respondents” sa nagapadayon nga imbestigasyon sang international tribunal.
Suno sa kay Duterte, wala pa siya nakaistorya sa iya amay nga si anay Presidente Rodrigo Duterte nga subject sang imbestigasyon.
Samtang, ginpahayag naman ni Vice President Duterte nga wala ini sang plano nga magpasaka sang reklamo batok sa self-confessed gunman nga si Arturo Lascañas, nga nag-angot sa iya sa serye sang extrajudicial killings sa Davao City sang siya pa ang alkalde.
Sa pagkamatuod, suno sa iya, si Lascañas ang ginahangkat niya nga magpasaka sang kaso.
Matandaan nga ginpahayag ni Lascañas nga si Duterte ang may kahilabtanan sa pagpatay nga ginhimo sang “Davao Death Squad” sang iya panahon bilang Davao City mayor.
Suno kay Lascañas, si VP Sara ang pasimuno sang Oplan Tokhang.
Nahibaluan nga yara subong si Vice President kag Department of Education Secretary Sara Duterte sa Malaysia para sa iya ng mandato bilang Presidente sang Southeast Asian Ministers of Education Organization Council.
