ILOILO CITY- Gin-athag ni Vice President kag Education Secretary Sara Duterte nga wala ini nakaistorya angot sa pulitika sa iya amay nga si anay president Rodrigo Duterte kag kay President Ferdinand Marcos Jr.
Suno kay Sara, pareho nga wala nakapasilabot ang duha sa iya desisyon bilang isa ka politiko bangud ginarespeto nila ang iya luyag matabo bilang babaye.
Sa pihak sini, ginpahayag ni Duterte nga pareho nga nagpahayag sang pagkabalaka sa iya ang duha.
Ini nga pahayag sang opisyal ang kasunod sang pagkatingala sang iban nga mamalidha kun ngaa nagtambong ini sa prayer rally para kay Kingdom of Jesus Christ (KOJC) founder kag leader Apollo Quiboloy nga nagapangatubang sang abuse kag iban nga charges sa committees sa House of Representatives kag sa Senado.
Apisar ang prayer rally nagpahayag sang suporta kanday Davao City 1st District Rep. Paolo Duterte kag Davao City Mayor Sebastian Duterte, may mga panawagan man nga magpanaog si Marcos sa pwesto kag may mga nag-insulto man kay First Lady Liza Araneta-Marcos.
Apang wala ini sang pahayag tuhoy diri, sa baylo, ginplastar niya ang pagkinahanglan nga resolbahon ang mga national issues.
