VP Sara, gin-updan sa korte ang iya utod nga si Pulong kasunod sang gastropub incident

Gin-updan ni Vice President Sara Duterte ang iya utod nga si Davao City First District Representative Paolo “Pulong” Duterte sa pag-atubang sini sa court proceedings kahapon, Agusto 13, sa Regional Trial Court Branch 52 sa Davao City.

Nagaatubang si Rep. Paolo sang reklamo nga grave threats nga ginpasaka sang negosyante nga si Kristone John Patria.

Ginapatihan nga natabo ang insidente sang Pebrero 23, 2025 sa isa ka gastropub sa Davao City nga nakit-an mismo sa closed circuit television (CCTV).

Sa video nga naglapta online, makita nga nagsulod si Duterte sa isa ka bar kag ginapatihan nga ginkompronta kag ginsulong ang isa ka indibidwal.

Nag-preside si Judge Clarissa Superable-Develos sa proceedings.

Wala na ginbasa ang Information matapos ini i-waive sang abogado ni Duterte.

Apang wala anay nagpasaka sang plea ang depensa bangud padayon sini nga ginakuwestyon ang jurisdiction sang korte sa kaso kag sa Information.

Suno kay Duterte, santo sa laygay sang iya abogado, nagdesisyon siya nga indi anay magpasaka sang plea bilang kabahin sang ila jurisdictional challenge.

Nahibaluan nga may kaso man nga grave threats nga ginpasaka batok sa vice president bangud sa ginaalegar nga pamahog sini sa president, first lady, kag former house speaker, apang nag-file ang iya kampo sang motion to quash sa korte.#