ILOILO CITY – Samtang may risgo pa sang COVID-19 transmission, wala lang anay sang holding hands, kup-anay, halukanay, ukon anuman nga pisikal nga pag-angganay sa pampubliko nga lugar sa syudad sang Iloilo, ang City of Love.
May ordinansa na nga daan sa syudad nga istrikto nga nagamandu sang physical distancing sa mga tawo sa pampubliko nga lugar — may relasyon man ukon wala.
Sa idalom sang Regulation Ordinance (RO) 2020-066, nakasaad nga P5,000 ang multa sa public establishments nga wala nagapatuman sang isa ka metro nga physical distancing sa mga tawo nga yara sa sulod sang establisemento.
Sa interview sang Bombo Radyo kay Jeck Conlu, spokesperson sang COVID-19 team, iya ginpahayag nga indi man maka Public Display of Affection (PDA) ang magkarelasyon ukon maghimata kun in-place pa ini nga ordinansa.
Ini nga pahayag ni Conlu ang may kaangtanan sa bag-o nga mando sang Philippine National Police kun sa diin ginadumilian na ang PDA sa pampubliko nga lugar lakip na ang holding hands.
Ini ang may kaangtanan sa gihapon sa mga ginapatuman nga tikang agud malikawan ang paglapta sang COVID-19.
Sakop sang ban ang pag-kiss kag pagkupo sa pampubliko nga lugar.
Magluwas sa couple, sakop man sang ban ang magpamilya kag mag-abyan.
