ILOILO – Nagapanindugan si League of Municipalities of the Philippines – Iloilo Chapter President Mayor Rosario Mediatrix “Trixie” Fernandez nga wala sila naga-demand bilang mga alkalde sa Schools Division of Iloilo, ilabi na sa Schools Division Superintendent ukon sa mga manunudlo.
Sa interview sang Bombo Radyo kay Mayor Fernandez sang San Enrique, iya ginpahayag nga luyag niya kuntani mahibaluan ang status sang manunudlo nga ila ginpatigayon sa ila locality, apang wala ini ginpaathag ni Dr. Ma. Luz De los Reyes nga amo ang anay Schools Division Superintendent sang Probinsya sang Iloilo.
Suno kay Fernandez, nagakinahanglan lang ini sang pagpaathag kay De los Reyes kun bala kwalipikado sa posisyon ang mga manunudlo nga nagapangayo sang bulig–bagay nga napaslawan nga ihatag sang superintendent.
Matandaan nga sang damlag lang, nag-init ang tensyon sa tunga sang pila ka mga alkalde kag ni De los Reyes matapos gintawag ang superintendent bilang arogante.
Apang, ini naman ang ginpanginwala ni De los Reyes bangud na-misinterpret lamang sang mga opisyal ang iya tono.
Ginpahayag dugang sang natungdan nga mas maayo kuntani nga may yara sang komunikasyon kag ‘mutual respect’ ang superintendent sa mga alkalde agud mangin matalunsay ang relasyon sang mga ini.
