Nagpasa sang mga dokumento ang Bureau of Customs Collection District 6 sa bahin sang National Bureau of Investigation (NBI) agud pamatud-an nga wala sila sang ginatago nga kamala-malahan sa rice importation ilabi na sa Port of Iloilo.
Suno kay Noli Santua, Jr., acting deputy collector for operations sang nasambit nga ahensya, mismo ang NBI ang nag-request sang mga papeles bilang kabahin sang ila nga inquiry sa gina-alegar 38,400 metric tons sang bugas nga nag-abot sa Iloilo halin sa Vietnam.
Sa ngalan sang transparency suno kay Santua, gin-furnish man sang Customs ang mga dokumento sa NBI.
Ginhangkat man ni Santua ang yara sa likod sang pagpalapta sang impormasyon nga may nagakatabo nga rice smuggling activities sa Port of Iloilo halin sang Agusto 4-13.
Kun may basehan ini suno sa opisyal, sa baylo nga magpataka sa pagpa-guwa sang statement, mas maayo nga magplastar sang mga dokumento kag i-atubang mismo sa BOC agud mahatagan sang nagakaigu nga atensyon.
Ginpaathag man sang BOC-Collection District 6 nga ang tanan nga rice shipments ang covered sang clearances kag permits nga gin-isyu sang Bureau of Plant Industry in compliance sa Republic Act 11203 ukon ang Rice Tariffication Law.
Ginahulat man subong kun ano ang mandu ni Customs Commissioner Yogi Filemon Ruiz kasunod sang amo nga kontrobersiya. May napasa naman nga report kay Ruiz. ##
