Ginpangunahan ni Presidente Ferdinand Marcos Jr. ang pagbukas sang ika-49 nga ASEAN Summit subong nga Domingo.

Sa iya speech, ginplastar sini ang importansya sang paghiusa kag pagbinuligay sang 11 ka miyembro nga mga pungsod sang Association of Southeast Asian Nations (ASEAN).

Ginpahayag sang Presidente nga bisan lain-lain ang kadakuon, maragtas, kag kultura sang tagsa ka pungsod, naga-updanay ang mga ini sa pagpaninguha para sa palaabuton sang rehiyon.

Gintumod man sini ang pre-hispanic balangay boat nga makita sa logo sang summit nga nagasimbolo sang tingob nga pagpanglakaton sang mga pungsod.

“We come as equals, carrying the hopes of our peoples and a shared responsibility to transform them into a common purpose,” pahayag sini.

Suno kay Marcos, lakip sa mga pagpanghangkat nga gin-atubang sang rehiyon amo ang tensyon sa tunga sang mga pungsod, ang wala kasiguruhan sa ekonomiya, pagsanyog sang bag-o nga teknolohiya, climate change, kag mga peligro nga nagalab-ot sa nagkalain-lain nga pungsod.

Natilawan man suno kay Marcos ang paghiusa sang rehiyon bangud sa krisis sa Middle East, ilabi na sa mga peligro nga gina-atubang sang mga pumuluyo sang ASEAN nga nagatrabaho sa iban nga pungsod kag sa posibilidad nga maapektuhan ang suplay sang gatong.

Sa baylo nga kanselahon ang summit, nagdesisyon ang mga miyembro nga mas kinahanglan ang paghiusa sang ASEAN sa tunga sang amo nga sitwasyon.

“When national capacities are tested, regional strength reinforces,” dugang sang presidente.

Nahibaluan nga kaina sang aga, upod ni President Marcos si First Lady Liza Araneta Marcos nga nag-abi-abi sa world leaders sa Philippine International Convention Center sa Pasay City.