Ang Southwest Monsoon ukon Habagat naga-apekto sa bug-os nga pungsod.
Ang Severe Tropical Storm Mawar (nga gintawag nga Betty sang yara pa ini sa Philippine Area of Responsibility) ulihi nga nasiplatan sa kalayuon nga 945 km naaminhan nasidlangan sang Extreme Northern Luzon.
Dala sini ang kabaskugon sang hangin nga 95 km/h kag pagmadlos nga tubtub sa 145 km/h.
Nagahulag ini pa naaminhan-nasidlangan sa kadasigon nga 25 km/h.
Lauman nga mangin maulanon subong nga adlaw sa bilog nga Western Visayas bangud sa Habagat.
Ginapaandaman ang publiko sa posible pagluntad sang flash floods ukon pagtiphag sang duta sa tion nga magmunog gid ang bubo sang ulan.
May ginpapanaog man nga Orange Warning level sa Antique kag sa pila ka banwa sa Iloilo lakip ang San Joaquin, Miagao, Guimbal, Tigbauan, Oton, Iloilo City, Pavia, kag Leganes.
Buot silingon, may pamahog sang pagbaha sa manubo nga areas kag landslides sa nabukid nga areas.
May yara naman sang Yellow Warning level sa Igbaras, Tubungan, Leon, kag San Miguel sa Iloilo kag amo man sa probinsya sang Guimaras.
Buot silingon sini, posible ang pagbaha sa manubo nga areas kag landslides sa nabukid nga areas. #
