ILOILO – Naglab-ot sa 37 nga Locally Stranded Individuals (LSIs) nga mga estudyante kag professor sang University of the Philippines-Los Baños ang gin-repatriate sang Armed Forces of the Philippines (AFP) subong nga adlaw, Hunyo 6.
Sa interview sang Bombo Radyo kay Major Cenon Pancito III, tagpamaba sang 3rd Infantry Division sang Philippine Army, iya ginpahayag nga ginpaagi sa Inter-Agency Task Force for the Management of Emerging Infectious Diseases ang request sa repatriation.
Suno kay Pancito, gintapos sang mga estudyante kag professor ang mandatory quarantine sa Metro Manila kag nagpaidalom man sa Real-Time Reverse Transcription Polymerase Chain Reaction (RT-PCR) test.
Sa subong, ang repatriates ang nagatinir sa University of the Philippines – Miagao.
Ginkumpirma man ni Pancito nga ini ang labing-una nga C13O flight sang Armed Forces of the Philippines bangud ang ginsakyan nga eroplano ang eksklusibo lang nga ginagamit sa pag-ship sang cargoes kag medical equipment umpisa sang COVID-19 pandemic sa Pilipinas.
