Opisyal na nga nakabalik sa kalibutan ang apat ka astronauts halin sa 10 ka adlaw nga maragtason nga Artemis II moon mission sang National Aeronautics and Space Administration (NASA).
Natabo ang splashdown sa Pacific Ocean sa San Diego, California, Estados Unidos sang Amerika 8:07 subong nga aga oras sa Pilipinas.
Gilayon nga nag-assist ang United States Navy para sa recovery efforts para kanday Commander Reid Wiseman, pilot Victor Glover, kag mission specialists nga sanday Christina Koch kag Jeremy Hansen.
Abril 1 sang naghalin ang crew para sa maragtason nga misyon pakadto sa bulan.
Ini ang una nga crewed mission sa sulod sang halos lima ka dekada nga nagpalapit sa lunar orbit.
Sila subong ang naga-uyat sang record bilang may pinakamalayo nga nalab-ot nga distansya sa space nga nagdangat sa 252,760 miles.
Ang apat ka astronauts amo man ang una nga ginpadala sang giant Space Launch System rocket sang NASA sakay sa Orion spacecraft.
Indi ini landing mission apang nagserbe ini nga importante nga test flight sa lunar space bilang paghanda sa ginaplano nga potential lunar landing sa 2028.
Nahibaluan nga ang pagbalik ukon ang re-entry sa earth amo ang ginakabig isa sa pinakamakatalagam nga bahin sang spaceflight bangud sa exposure sa temperatura nga lab-ot sa 5,000 degrees Fahrenheit samtang nagabyahe ang spacecraft sa atmosphere.
Dugang diri, ang heat shield sang Orion spacecraft nga ginasakyan sang apat ang may yara na nga daan sang flaws sa desinyo. Ang shield amo ang critical layer sang thermal protection sa idalom nga amo ang nagahatag sang proteksyon sa astronauts gikan sa tuman nga init.
Ini nga misyon ang labing-una nga tion nga may karga nga crew ang amo nga capsule.
Sa Artemis I mission sang 2022 nga isa ka test flight sang Space Launch System rocket and Orion capsule, nakit-an sang NASA ang unexpected damage sa heat shield sang spacecraft.
Nakit-an sa imbestigasyon nga nag-crack ang material kadungan sang atmospheric re-entry.
Kasunod sang hitabo, gin-modify sang ahensya ang heat shield design para sa sunod nga Artemis flights.
Sa Artemis II, natukod na nga daan sang NASA ang capsule kag na-assemble sang nahibal-an sang ahensya ang damage nga naangkon sa Artemis I.
Sa baylo nga himuon liwat ang heat shield, nangita ang NASA sang modified path para sa re-entry sang capsule para mapahagan-hagan ang risgo sa astronauts.#
