ILOILO CITY – Nakabaton sang memorandum ang Western Visayas Medical Center-Subnational Laboratory nga kinahanglan magpadayon sila sa operasyon apisar nga holiday.
Sa interview sang Bombo Radyo kay Dr. Stephanie Abello, chief pathologist sang Western Visayas Medical Center-Subnational Laboratory, iya ginpahayag nga nagahimo na lamang sila sang alternatibo agud nga makaselebrar man sang Paskwa kag makasug-alaw man sang bag-ong tuig ang ila mga empleyado.
Suno kay Abello, maga-alternate sila sang duty sa laboratoryo sa mga holidays.
Bangud diri, ang magaduty sa Disyembre 25 nga empleyado ang mahimo maka day off sa Disyembre 31 and vice versa.
Sa status naman sang laboratory, wala na sang may na record nga backlog suno kay Abello kag yara na sa 24 tubtob 48 ka oras ang turn around time.
May yara naman sang masobra 50 percent sa pagnubo sang numero sang specimen nga mabaton sang laboratory.
Matandaan nga una na nga ginpahayag sang nasambit nga laboratoryo nga may mga schedule sila sa holidays agud nga magsira man para makapauli sa ila pamilya kag makaselebrar sang holiday season.
Ini agud ma-decontaminate suno kay Abello ukon matinluan man ang nasambit nga laboratory matapos ang masobra 250 nga inadlaw nga sila naga-obra kag wala sang pahuway.
Nahibaluan nga sa subong, may yara na sang 11 tanan ka mga laboratoryo nga naga-operate sa syudad sang Iloilo.
