ILOILO CITY – Nagaapekto ang eyesight ukon panan-awan sa kalidad sang pagpangabuhi sang isa ka tawo.
Ini ang rason sang Western Visayas Society of Opthalmology sa pagpakigbahin sa Bombo Medico 2019 nga patigayunon sa Hulyo 14 sa Iloilo Science and Technology University (ISATU).
Sa interview sang Bombo Radyo kay Dr. Karen Francia, Presidente sang Western Visayas Society of Ophthalmology, iya ginpahayag nga masami nga nagapakigbahin sa Bombo Medico ang ila grupo agud nga makabulig sa mga may yara sang problema sa pannan-awan ukon balati-an sa mata.
Suno kay Dr. Francia, magabuligay ang mga opthalmologist kag ang mga optometrist sa paghatag sang libre nga serbisyo sa para sa mga bulag ukon may yara sang balati-an sa mata nga magapakunsulta sa Bombo Medico.
Gin-athag ni Dr. Francia nga ang mga ophthalmoloist amo ang mga medical doctor nga eksperto sa mata samtang ang mga optometrist naman ang makabig nga eye care professionals nga makabulig sa sight testing tubtub sa sight correction ukon ang mga eksperto sa paghatag sang antipara.
Sa palaabuton nga Bombo Medico, ginpahayag ni Dr. Francia nga handa ang Western Visayas Society of Ophthalmology nga magpakigbahin sa pinakadaku nga medical event sa syudad sang Iloilo.
May yara sang screening nga patigayunon suno sa natungdan agud nga mahibalu-an kun nagakinahanglan sang medical treatment ukon antipara ang pasyente.
Yari ang pagpahayag sang commitment sang Western Visayas Society of Ophthalmology sa Bombo Medico 2019.
