Gin-deklarar sang World Health Organization (WHO) nga indi na isa ka global health emergency ang mpox ukon kilala anay nga monkeypox.
Suno kay WHO Director-General Tedros Adhanom Ghebreyesus, sa nagligad nga tatlo ka bulan, 90% nga mas manubo na ang na-report nga mga kaso ipaanggid sa nagligad pa gid nga tatlo ka bulan.
Matandaan nga Hulyo sang nagligad nga tuig sang nag-deklarar ang WHO sang emergency bangud sa amo nga balatian.
Kaangay man ini sa emergency declaration nga ginpaguwa sa seryoso nga mga disease outbreaks sa kalibutan kaangay sa coronavirus disease 2019, H1N1 flu, polio, kag Ebola.
Halin sang Enero 2022, masobra na sa 87,000 ka mga kaso sang mpox ang narekord sa 111 ka mga pungsod lakip na sa Pilipinas.
Sa sini nga numero, 140 ang nagkalamatay.
Ang mga nakaangkon sini nga balatian ang nag-develop sang rashes sa kamot, tiil, dughan, nawong ukon bisan sa baba, kag malapit sa genitals.
Sa sini nga outbreak, ginpahayag nga masami ini maglapta paagi sa pagpakighilawas, kag mga lalaki ang reported nga kalabanan nga nalatnan sang sini nga balatian. #
