Isa pa ka Asian country ang nakasulod sa knockout stage sang FIFA World Cup 2022 matapos naghimo sang upset ang South Korea kag ginlutos ang powerhouse team nga Portugal nanday Christiano Ronaldo sa group match, 2-1.
Bangud sini, abante na sa round of 16 ang South Korea nga ginkalipay naman sang Asian football fans kasunod man sang pag-qualify sang Japan sa amo nga round.
Sa hampang sang South Korea batok sa Portugal, ang naka-goal para sa Asian powerhouse team amo sanday Kim Young-gwon sa 27th minute kag ang stoppage-time strike ni Hwang Hee-chan sa first minute sang added time.
Ang isahanon naman nga goal sa Portugal ang nagikan kay Ricardo Horta sa ika-lima nga minuto sang hampang.
Apisar nalutos sa sini nga match, una na nga naka-qualify ang Portugal sa knockout stage matapos sini gindaog ang una nga duha ka hampang.
Ang kadalag-an sang South Korea batok sa Portugal nagakahulugan man nga taktak na sa World Cup tournament ang isa pa ka powerhouse team sa Group H — ang former champions nga Uruguay.
Ini apisar ginlutos sang Uruguay ang Ghana, 2-0, sa ila final nga group match.
Kun lantawon ang group tally, patas nga may apat ka puntos ang South Korea kag ang Uruguay kag pareho man nga zero sa goal differential.
Ang sunod nga tiebreaker amo ang na-skor nga goal — diri abanse ang Asian team bangud duha lang ang na-skor sang Uruguay.
Yari ang natipon nga puntos sa Group H:
PORTUGAL – 2 wins, 0 draw, 1 loss – 6 points
SOUTH KOREA – 1 win, 1 draw, 1 loss – 4 points
URUGUAY – 1 win, 1 draw, 1 loss – 4 points
GHANA – 1 win,0 draw, 2 losses – 3 points
