Gindeklarar sang Philippine Atmospheric, Geophysical and Astronomical Services Administration (PAGASA) nga “worst is over” kun pagahambalan ang tuman ka taas nga temperatura sa pungsod subong nga tuig.
Suno kay PAGASA climate monitoring and prediction section chief Ana Liza Solis, posible nga na-rekord na ang pinakamataas nga aktwal nga temperatura subong nga tuig kasunod sang napagkit sa Tarlac sang Abril 27 nga nagdangat sa 40.3 degrees Celsius.
Sa pihak sini, madamo gihapon nga mga lugar ang nagatupa sa delikado nga lebel sang heat index ukon kapaang nga yara sa 45-48 degrees Celsius.
Dugang sini, Marso, Abril, kag Mayo ang “peak” sang El Niño kag posible nga magasulod na ang localized thunderstorms sa second half sang bulan sang Mayo nga amo ang magapaumpaw sa tuman nga kapaang nga mabatyagan.
Kun magpadayon ang localized thunderstorms kag may yara sang dalagku nga weather systems kaangay sang low-pressure areas, intertropical convergence zones, ukon ang mga bagyo, posible nga ideklarar ang opisyal nga pagsugod sang rainy season.
Ginalantaw man sang state weather bureau nga 60% ang tyansa nga ma-eksperyensyahan ang La Niña ukon ang sobra-sobra naman nga pag-ulan sa Hunyo, Hulyo, kag Agusto. #
