ILOILO CITY- Naglain ang buot sang chairman sang Western Visayas Transport Cooperative nga si Raymundo Boyet Parcon bangud sa ginpangbuy-an nga pahayag sang presidente sang Sphere Drivers and Operators Transport Cooperative nga si Alrey Arevalo.
Natuhoy ini sa alegasyon ni Arevalo nga ang iban nga mga opisyal sang kooperatiba sa syudad ang nagalagas lang sa kwarta kag personal nga interes sa baylo nga ang kaayuhan sang ila mga myembro.
Sa interview sang Bombo Radyo kay Parcon, iya ginpahayag nga lunsay wala sang basehan ang alegasyon ni Arevalo ilabi na kun kwarta sang kooperatiba ang pagahambalan.
Suno kay Parcon, may yara sang transparency ang koperatiba kag ginaplastar sa mga myembro ang tanan nga financial statement.
Ginhangkat naman ni Parcon si Arevalo nga pangalan kun ano gid nga kooperatiba ang iya ginatumod.
