Nagpangayo sang pasaylo si Meta Chief Executive Officer (CEO) Mark Zuckerberg sa mga ginikanan matapos nga may indi maayo nga epekto ang social media sa ila mga kabataan.
Ini ang ginhimo ni Zuckerberg sa ginpatigayon nga Senate hearing sa Amerika kun sa diin gingisa man sa atubang sang Judiciary Committee ang chief executives sang iban pa nga dalagku nga tech companies kaangay sang TikTok, Snap, X (ukon kilala anay nga Twitter) kag mangin ang messaging platform nga Discord.
Masobra apat ka oras ang pagkwestyon sang mga senador kag gusto mahibaluan kun ano ang ila ginahimo agud nga maprotektahan ang kabataan online.
Ginhatagan naman ni Republican Senator Josh Hawley si Zuckerberg sang kahigayunan nga magpangayo sang pasaylo sa mga pamilya.
Ginpakita man sang senador ang video sa diin nagahambal ang mga kabataan sang ila nangin malain nga eksperyensya sa ginhimo nga pag-bully sa social media. Ang iban sa mga ini ang nagpanginmatay pa matapos nabiktima sang sexual predators.
Diri na kag ginsiling ni Hawley nga nagatambong man sa hearing ang pamilya sang mga kabataan nga biktima sang social networks.
“Have you apologized to the victims? Would you like to do so now? … They’re here. You’re on national television.”
Nagtindog si Zuckerberg sa iya pulungkuan, nag-atubang sa mga tawo, kag nagsiling: “I’m sorry for everything you have all been through.”
“No one should have to go through the things that your families have suffered, and this is why we invested so much and are going to continue doing industry-leading efforts to make sure that no one has to go through the types of things that your families had to suffer,” dugang pa sini.
Diri man nga hearing ginkwestyon ang chief executive officer sang Chinese-owned social media app nga TikTok nga si Shou Zi Chew.
Ang TikTok ang ginapanag-iyahan sang Chinese company ByteDance.
Sang ginpamangkot ni US Senator Tom Cotton sang sulit-sulit ang chief executive officer, sulit-sulit man sini nga ginsiling nga isa siya ka Singaporean, wala sang kaangtanan sa Chinese Communist Party, kag wala gid naka-share ukon naka-request sang US users’ data sa Chinese government.#
Images source: © GETTY | Tom Williams via essanews
