ILOILO CITY – Bastante sa gihapon ang numero sang mga kapulisan nga nakadeploy sa mga border checkpoints sa probinsya sang Iloilo.
Ini apisar nga may yara na sang 101 ka mga kapulisan nga ginkabig Person Under Monitoring kag ginpaidalom sa quarantine kag isa naman ang Person Under Investigation.
Sa interview sang Bombo Radyo kay Pol Lt. Col Joem Malong, tagapamaba sang Police Regional Office 6 iya ginpahayag nga kun may yara sang magpositibo sa ila nga personnel ukon may yara sang maka close contact sa nagpositibo sa COVID-19 gilayon siya nga ipaidalom sa quarantine lakip na ang tanan nga mga nakaupod niya.
Suno kay Malong, apisar nga nanugunan sila sa 101 ka mga pulis nga ginpaidalom sa quarantine bangud dako pa kun tani ang mabulig nila sa operasyon sang kapulisan indi sa gihapon nila mabutang sa alang-alang ang iban pa nga mga personnel bangud sa tion nga may yara pa sila sang malatnan dako ang mangin epekto sini sa ila nga operasyon.
Samtang, may kaangtanan naman sa pagpatuman sang curfew bangud sa enhance community quarantine nagdangat na sa 1,501 ang nagkaladakpan nga naglapas sa curfew sa bilog nga Western Visayas.
Sa diin nagapanguna diri ang Bacolod City nga may yara sang 685 nga nagkaladakpan, ika-duha ang Negros Occidental 39, Iloilo City 148, Probinsya sang Iloilo 114, Aklan 57, Antique 57, Capiz 31 kag Guimaras 1.
Suno kay Pol Lt. Col Joem Malong, naga apelar sila sa mga pumuluyo nga sundon ang curfew nga ginapatuman bangud posible nga magapangatubang sang nagakaigo nga silot ang sinoman nga madakpan.
