Patay ang 11 ka tawo lakip na ang isa ka journalist matapos naglunsar ang Turkey sang airstrikes sa northern regions sang Syria kag Iraq.
Ang 11 ang lunsay nagikan sa Syria samtang wala naman sang reported nga napatay sa Iraq suno sa report sang Syrian Democratic Forces.
Suno sa defence ministry, gin-atake sang warplanes ang Kurdistan Worker’s Party, PYD People’s Defense Units, kag Union of Communities in Kurdistan.
Gin-cite man sang ministry ang right to self defense sang Turkey sa idalom sang Article 51 sang United Nations Charter kasunod sang paglunsar sang amo nga operasyon nga gintawag sini nga “Claw-Sword” nga ginpahayag nag-target sa mga lugar nga ginagamit sang mga terorista sa ila pagpang-atake sa Turkey.
Ini nga airstrikes ang ginpatigayon sa kasunod sang natabo nga pagpamomba sa Istanbul, pinakadaku nga syudad sa Turkey, sang nagligad nga Nobyembre 13 kun sa diin anum ka tawo ang patay kag masobra 80 ang pilason.
Ginbasol sang Turkish authorities ang PKK kag ang Syrian affiliate sini nga YPG bangud sa natabo, apang nagpanginawala naman ang Kurdish militant groups sa ila nga involvement.
Matapos ginlunsar ang strikes, nag-post man ang Defense Ministry sang laragway sang F-16 fighter plane nga may nakasulat, “Payback time! The scoundrels are being held to account for their treacherous attacks.”
Gin-claim sang ministry nga nahalitan ang 89 targets kag madamo nga “terorista” ang ila napatay.
