Ginapaabot sang Philippine Atmospheric, Geophysical and Astronomical Services Administration (PAGASA) nga posible pa nga may masobra 16 ka bagyo nga magsulod sa Pilipinas halin Agosto tubtob Disyembre subong nga tuig.
Base sa estimation sang PAGASA, may yara sang duha tubtob tatlo ka bagyo sa Agosto, duha tubtob apat naman ang bulan sang Setyembre kag Nobyembre, samtang sa bulan naman sang Disyembre pagalauman nga isa tubtob duha ka bagyo ang magaabot.
Suno sa historical records sang ahensya, kadam-an sang bagyo nagaigo sa Pilipinas sa mga bulan sang Hulyo, Agosto kag Setyembre.
Amo man ini ang ginapaabot nga pareho nga pattern subong nga tuig.
Ginpahayag man sang PAGASA nga mas mataas ang posibilidad nga mag-develop ang La Niña phenomenon, bisan pa nga sa subong neutral pa ang kondisyon sang El Niño–Southern Oscillation (ENSO) pattern.
May mga climate models nga nagapakita nga posible magsugod ang La Niña sa tunga sang Agosto kag Oktubre, kag posible magpadayon tubtob Disyembre ukon Pebrero 2026.
Sa pihak sini, wala pa naga-lab-ot sa 55% ang threshold nga basehan sang PAGASA agud mag-isyu sang La Niña Watch.
Nagapanugyan naman ang ahensya sa publiko kag sa mga lokal nga pang-gobyerno nga magpabilin nga alerto kag pirme mag-monitor sang mga update sa panahon, labi na sa pagsulod sang mas mabaskog nga typhoon season.
