Nangin mas malala pa kag nangin mas matunog ang warning nga ginpaguwa sang Iran batok sa mga residente nga nagapasakop sa nationwide protests.
Sa atubang mismo sang publiko, ginpatay ang isa ka 23-anyos nga lalaki nga si Majidreza Rahnavard nga ginapahayag nagbuno sa duha ka myembro sang paramilitary force bangud sa iya kaakig sa security forces nga nagapangpatay sa protesters.
Ginsapubliko man ang mga laragway sang public execution kun sa diin nakit-an ang isa lalaki nga nakahigot ang kamot kag ginbitay sa construction crane.
Nakamaskara ang security forces nga nag-kordon sa lugar kun sa diin ginpatigayon ang public execution samtang may mga tawo man nga nagalantaw apang may yara sang mga barikada.
Ikaduha na si Rahnavard sa mga preso nga ginpatay bangud sa kahilabtanan sa protesta.
Ang una amo ang 23-anyos man nga si Mohsen Shekari nga ginpatay sang nagligad nga Huwebes bangud sa pag-atake sini kag pagpilas sa isa ka miyembro sang Basij paramilitary force sa central Tehran.
Tuyo sang public execution nga ipakita sa publiko kun ano kadasig ang ginahimo sang Iranian judiciary sa mga kaso nga naangot sa protesta.
Nagpaandam man ang iban nga mga aktibista nga dinosena na sa ila ang nasentensyaha sang kamatayon sa closed-door hearings.
Ginapahayag 488 na ka tawo ang ginpangpatay halin sang ginpatigayon ang demonstrations sa tunga-tunga sang bulan sang September suno sa Human Rights Activists sa Iran.
