Ginalantaw sang Department of Justice (DOJ) nga tatlo tubtub apat ka tawo ang naghimbon agud planuhan ang pagpatay kay former Negros Oriental Governor Roel Degamo.
Suno kay Justice Secretary Jesus Crispin ‘Boying’ Remulla, conspiracy ang natabo kag may mastermind base sa kadamuon sang napatay kag napilasan sa isa lang ka pagsulod sa compound ni Degamo sang Sabado sang aga.
Suno naman sa Special Investigation Task Group Degamo, maid-id ang pagtuon sang perpetrators sa hulag kag aktibidad sang governor bilang preparasyon sa murder.
Base sa mga testimoniya, may surveillance activities na nga ginhimo ang mga suspek halin sang Disyembre, apang indi pa sigurado ang otoridad kun paano na-infiltrate sang mga suspek ang security detail ni Degamo.
Samtang, nagtukod naman ang Malacañang sang task force agud usisaon ang ginsiling ni Remulla nga may “pattern of impunity” sa Negros Oriental bangud sa mga nagligad nga mga krimen nga wala napasabat ang mga suspek.
Kasunod sang asasinasyon kay Gov. Roel Degamo kun sa diin personal nga nagbisita sa haya ang tiglikom, nadiskubrehan sini nga may nagligad pa nga mga insidente kun sa diin na-dismiss ang kaso kag wala natatapan.
Suno pa sa justice secretary, may pila ka mga pangalan nga nalawagan sa iya pagbisita kag nabuyagyag man suno sa iya kun ano ang matuod nga nagakatabo sa malawig na nga tion. ##
